Ելույթ AAMC-ի կողմից, 2022 թվականի ապրիլի 24. Էվրո Նորմանդիա քաղաք
Allocution de l’association AAMC du 24 avril 2022 à Evreux
Traduction en arménien : Mme Syuzanna Chibukhchyan
1975 թվականի ապրիլի 24֊ին , իր մահից 4 տարի առաջ, Ժոզեֆ Կեսսելը գրել է.《 Ես շատ լավ հիշում եմ, որ նույնիսկ Առաջին համաշխարհային պատերազմի սարսափի մեջ 1915 թվականի հայկական ողբերգությունը խոր հույզեր առաջացրեց իմ մեջ։ 《Ցեղասպանություն》բառն այն ժամանակ դեռ արդիական չէր, բայց ես հետո զգացի այդ բառի նշանակությունը 》։
Մենք ՝Էվրո քաղաքի և շրջակայքի հայ֊ֆրանսիական երկու ասոցիացիաների ՝ANSA ֊ի և AAMC֊ի անդամները, հետևորդները, ինչպես նաև ընկերներն ու բարեկամները, բոլորս հավաքվել ենք ՝հարգանքի տուրք մատուցելու եղեռնի զոհերի հիշատակին։ Հիշատակել հայոց ցեղասպանությունը, նշանակում է այլևս երբեք բարբարոսություն երկրի վրա։
Մեր միասնական ներկայությունը այս հուշարձանի առջև երկու ասոցիացիաների համատեղ ջանքերի արդյունքն է։ 2022 թվականի ապրիլի 8֊ին երկու ասոցիացիաների գրասենյակների անդամները հանդիպեցին ՝ մերձեցման հիմքեր ստեղծելու և առաջին հերթին այս հիշատակի օրը համախմբված և արժանապատիվ կազմակերպելու նպատակով։ Մեր զոհերի հիշատակի ու սգի օր, ինչպես նաև հույսի՝ մեր հազարամյա մշակույթը ժառանգող ու դինամիկ նոր սերնդի հույսի օր։
Ապրիլի 24֊ի այս օրը, եղեռնի զոհերի հիշատակի, ինչպես նաև բարբարոսության և մարդու նվաստացման մասին մտորումների և հիշատակի օր է ։ Մինչև ե՞րբ է մարդն իր մերձավորի հետ վարվելու ինչպես գայլ։
Այս մահաբեր, անմարդկային կազմակերպությունը , որն իրագործեց Հայոց ցեղասպանությունը 1915 թվականի ապրիլի 24֊ին , արդյո՞ք մահացել է։ Արցախում և Հայաստանում վերջին պատերազմները մեզ հիշեցնում են, որ մեր ժողովուրդը մշտապես վտանգի տակ է։ Մենք բոլորս հպարտ ենք, որ ֆրանսիացի ենք և երախտապարտ ենք մեր հայրենիք Ֆրանսիային ։ Մեր երկակի պատկանելիությունը պետք է պահպանվի և հարստացվի ՝ ապագա սերունդներին օրինակ ծառայելու համար։
Հիշեցնեմ, որ Մարսել Բոդոյի անվան պուրակում գտնվող հուշարձանի ծագումը վավերացվել է Էվրոյի նախկին քաղաքապետ Միշել Շամպրեդոնի օրոք քաղաքապետարանի կողմից, որը 2012թվականին քաղաքի տեխնիկական ծառայությունների (քաղաքաշինության և կանաչապատման ) համաձայնությամբ որոշեց, որ Հայոց ցեղասպանության հիշատակի հուշաքարը իրականություն կդառնա։
Մենք ջերմորեն շնորհակալություն ենք հայտնում նաև ներկայիս քաղաքապետ Գի Լեֆրանին, ով, չնայած իր կողմնակիցներից որոշ անդամների անհամաձայնությանը, ինչպես նաև նախնական նախագիծը փոփոխելուց հետո, վերջապես, վեց տարի ուշացումով համաձայնեց հուշաքարի տեղադրմանը։
Խոնարհվում եմ 1915 թվականի մեր զոհերի հիշատակի առաջ։ Հայ ժողովրդի փրկությունը նրա միասնության մեջ է։ Ես խորապես հավատում եմ, որ մեր ժողովուրդն իր խիզախությամբ, իր օրինակով և իր խորաթափանցությամբ մնում է հանդուրժողականության և ըմբռնման, բայց նաև իր իրավունքների, հաստատակամության և պահանջատիրության օրինակ ողջ մարդկության համար։
Շնորհակալություն ուշադրության համար ։
Սերժ Թաթեոսյան
AAMC-ի նախագահ
